STEAM Mərkəzi
Heydər Əliyev adına Müasir Təhsil Kompleksinin STEAM Mərkəzi məktəbin innovasiya yönümlü təhsil modelinin əsas strateji üstünlüklərindən biridir. Mərkəz şagirdlərin müasir texnologiyalarla birbaşa işləməsi, real layihələr üzərində praktiki bacarıqlar qazanması və gələcəyin akademik və peşə tələblərinə sistemli şəkildə hazırlanması məqsədilə yaradılmışdır. Tədris mühiti beynəlxalq STEAM yanaşmalarına uyğun olaraq qurulmuş və yüksək texnoloji avadanlıqlarla təchiz edilmişdir.
STEAM Mərkəzi əsasən 6–9-cu sinif şagirdlərinin tədrisi üçün nəzərdə tutulur və bu yaş mərhələsində STEAM və texnologiya yönümlü dərslər birbaşa laboratoriya şəraitində keçirilir. Aşağı yaş qrupları üçün isə kompleks daxilində ayrıca fəaliyyət göstərən iki əlavə STEAM laboratoriyası mövcuddur. Bu yanaşma şagirdlərin erkən yaşlardan başlayaraq mərhələli və davamlı texnoloji inkişafını təmin edir.
Mərkəzdə şagirdlər ideyadan hazır məhsula qədər olan bütün prosesi özləri həyata keçirirlər. Onlar 3D modelləşdirmə və çap imkanlarından istifadə edərək prototiplər hazırlayır, robototexnika və avtomatlaşdırma sistemləri üzərində işləyir, dron texnologiyaları və CNC avadanlıqları vasitəsilə real istehsal prosesləri ilə tanış olurlar. Micro:bit və mikrocontroller əsaslı elektronika sistemləri, mühəndislik üçün elektrik və sensor dəstləri, Boson modulları, LEGO SPIKE və VEX platformaları şagirdlərin texnoloji düşüncəsini dərinləşdirmək üçün aktiv şəkildə tətbiq olunur. Hazırlanan funksional robotlar, 3D çap edilmiş məhsullar, CNC ilə hazırlanmış mexaniki və taxta hissələr, eləcə də elektron prototiplər mərkəzdə nümayiş etdirilir və tədrisin real nəticələrini əks etdirir.
Tədris prosesi layihə əsaslı və nəticəyönümlü şəkildə qurulmuşdur. Şagirdlər mühəndislik düşüncəsi, proqramlaşdırma, alqoritmik yanaşma, analitik təhlil və problem həll etmə bacarıqlarını praktik fəaliyyət üzərindən mənimsəyirlər. Süni intellektə giriş, avtomatlaşdırılmış sistemlərin iş prinsipləri, məlumatların analizi və ağıllı texnoloji həllərin tətbiqi STEAM dərslərinin tərkib hissəsi kimi təqdim olunur. Bu yanaşma şagirdləri texnologiyanın yalnız istifadəçisi deyil, onu anlayan və inkişaf etdirə bilən fərdlər kimi formalaşdırır.
STEAM Mərkəzi eyni zamanda şagirdlərin beynəlxalq səviyyədə rəqabətədavamlı hazırlanmasını hədəfləyir. Şagirdlərimiz Teknofest, SAF, FIRST LEGO League (FLL) və digər nüfuzlu beynəlxalq yarışlarda iştirak etmiş, qalib və mükafatçı kimi Azərbaycanı uğurla təmsil etmişlər. Bu nəticələr mərkəzdə aparılan işin praktik dəyərini və effektivliyini açıq şəkildə göstərir.
STEAM Mərkəzinin vizyonu Müasir Təhsil Kompleksinin ümumi inkişaf strategiyasına uyğun olaraq, texnologiyaya hazır, süni intellekt və rəqəmsal transformasiya dövrünün tələblərinə cavab verən, analitik və yaradıcı düşüncəyə malik şagirdlər yetişdirməkdir. Mərkəz valideynlər üçün məktəbin təqdim etdiyi əsas üstünlüklərdən biri olaraq, şagirdlərin gələcəyinə yönəlmiş real, ölçülə bilən və davamlı nəticələr formalaşdırır.
